ڕۆژی یه‌‌کشه‌ممه، ڕێکه‌وتی ‏16‏/07‏/2006 له ئه‌نیستیتۆی کورد له برۆکسێل به به‌شداریی به‌رچاوی لایه‌نگران و ئه‌ندامان و دۆستانی حیزبی دێموکرات، به‌رنامه‌یه‌ک بۆ یادکردنه‌وه‌ی ساڵڕۆژی تیرۆری شه‌هید دوكتورقاسملوو له پێته‌ختی وڵاتی بلژیک به‌ڕێوه‌چوو. به‌رنامه‌که سه‌ره‌تا به سروودی نه‌ته‌وایه‌تیی ئه‌ی‌ڕه‌قیب ده‌ستی پێکردو دوایی به یه‌ک خوله‌ک بێده‌نگی بۆ ڕێزگرتن له گیانی پاکی شه‌هیدان دڕێژه‌ به‌ به‌رنامه‌که‌درا. دواتر له‌ لایه‌ن به‌رپرسی کومیته‌ی بلژیکه‌وه به‌شداربووان به‌خێرهاتن کران و به‌دوای ئه‌ودا به‌رپرسی کومیته‌ی پارتی دیموکراتی کوردستانی‌ عێراق به‌یاننامه‌ی خۆی به‌بۆنه‌ی ساڵڕۆژی تڕۆڕی شه‌هید دوكتورقاسملوو پێشکه‌ش کرد و وێڕای مه‌حکوومکردنی ئه‌و کرده‌وه‌ نامرۆڤانه‌یه‌ی بکووژانی شه‌هیدانی ڤیه‌ن، له‌ده‌ستچوونی دوكتورقاسملووی به زیانێک بۆ بزووتنه‌وه‌ی ڕزگاریخوازانه‌ی گه‌لی کورد نرخاند و داخ‌و كه‌سه‌ری‌ خۆی بۆ شه‌هیدبوونی دوكتور قاسملوو ده‌بڕی.
له به‌شێکی دیکه‌ی به‌رنامه‌که‌دا چه‌ند کورته فیلم له دوكتورقاسملوو بڵاوکرایه‌وه و به‌دوای ئه‌ودا له‌ لایه‌ن 'کاوه‌ ئاهه‌نگه‌ری' باسێک له‌سه‌ر که‌سایه‌تیی سیاسی و فیکریی دوكتورقاسملوو و ژیاننامه‌ی ئه‌و نه‌مره پێشکه‌ش به ئاماده‌‌بوان کرا.