چه‌ند شه‌و له‌وه پێش خانمه‌که‌م له‌پڕێکدا زگی وه‌ژان که‌وت و دوای چه‌ند کاتژمێرێک، به باشمان زانی که به‌ره‌و نه‌خۆشخانه‌ی شاری ''لویڤن''(Leuven) وه‌ڕێکه‌وین، دوای لێکۆڵینه‌وه‌ی سه‌ره‌تایی پزیشکه‌کان به‌وه گه‌یشتن که ئێش و ئازاره‌که هی ئاپاندیسیته، که چڵک ده‌کاتوو ده‌بێت ده‌ربهێندرێت.

شه‌وێ کاتژمێر 23:30  گه‌یشتینه نه‌خۆشخانه‌که‌ و به‌یانی کاتژمێر7:00 له ساڵۆنی نه‌شته‌رگه‌ریی ماڵئاواییم له 'سارا' کرد. نیوه‌ڕۆ که چوومه‌وه بۆ دیتنی سارا، دیتم هاوژووری پیره‌ژنێکی بلژیکییه‌و ئه‌ویش به‌هۆی نه‌خۆشی به‌ردی گورچیله‌ و دڵ له‌و نه‌خۆشخانه‌یه که‌وتوه. دوایی ئاشنایی سه‌ره‌تایی هه‌ندێک قسه‌وباسی هێنایه‌ گۆڕێ، کێیه و خێزانی بچووک و گه‌وره‌ی چۆنه و ... هتد. وه‌ک بۆخۆی درکاندی به‌داخه‌وه منداڵی نیه، به‌ڵام 9 براو 4 خوشک بوون و هه‌ن.

دوای نیوه‌ڕۆ پیاوێکی باڵابه‌رز و هه‌ندێک پیر هاته‌‌ژوورێ که مێردی ئه‌و خانمه پیره‌بوو. پیاوه‌که زۆر باشتر مابۆوه له ژنه‌که‌ی و ....

مێرده‌که‌ کووتی'' کادۆیه‌کم بۆ هێناوی''، قابێکی وێنه‌ی له‌سه‌ر ده‌ستی ژنه‌که‌ی دانا و ژنه‌که‌ی پێ‌خۆشحاڵ کرد، وێنه‌ی له چوارچێوه‌گیراوی سه‌گه‌که‌ی. سه‌گێکی به ڕه‌گه‌ز '' ڕۆمانی'' و بۆر و هه‌ندێک بڵیند و به دوو گوێی پان و درێژ. پیره‌ژن ڕووی له ئێمه‌کردو کووتی '' ئه‌وه سه‌گه‌که‌مه و کورێکی زۆر شه‌ریفه‌ و زۆرم خۆش ده‌وێت''. بیرم له وه‌ها کادۆ و وه‌ها کوڕوو وه‌ها شه‌ریفبوونێک کرده‌وه‌ و ته‌نیایی و بێمنداڵی ئه‌و پیره‌ژنه‌م هاته‌ به‌رچاو... وێنه‌که‌ی له‌سه‌ر مێزی په‌نای دانا، وه‌ها که هه‌میشه‌ بیبینێت.

نه‌ناسراو | 2006-08-27

کۆمێنت بێ‌ناو » وەهات نووسیوە هەر دەڵێی بێ‌منداڵی کارەساتێکی گەورەیە لەکاتێک دا شتێکی زۆر ئاسایی‌یە، لانی کەم لەناو خەڵکی رۆژئاوا دا. ئەو ژنە ئەگەر لە کوردستان با لەمێژ بوو تەڵاق درابوو یان ژنێکی دیکەی بەسەردا هاتبوو : ئەی چۆن؟ منداڵی نابێ !! وەکوو ئەوەیە کە بڵێی ئەو مانگایە شیر نادا ئەی بۆچمە !!. دوایە من دانی وێنەی سەگێکیش وەکوو دیاری زۆر بە ئاسایی دەزانم و پێم وایە چی سەیری تێدا نیە. سەگ لە لای ئێمە ئاوا بێقەدرە و بەشێکی ئەو کارەش دەگەڕێتەوە سەر کارتێکردنی ئیسلام کە تێیدا سەگ گڵاوە و کە دەستت لێیدا دەبێ حەوت جار بیسمیلی بکەی! دەنا چ عەیبی هەیە ئەگەر گیانلەبەرێکی وەفاداری وەکوو سەگت خۆش بوێ.

کاوه | 2006-08-28

کۆمێنت بێ‌ناو » به‌ڕێزم به‌خێر هاتن بۆ و سپاس بۆ سه‌ردانه‌که‌تان. ئه‌وه ته‌نیا ڕووداوێکه‌ و گێڕامه‌وه، وادیاره‌ که له ئه‌وروپا ده‌ژیت، به‌ڵام ئه‌گه‌ر به دروستی له مکانیزمی پێوه‌ندی نێوان مرۆڤه‌کان خووربینه‌وه، بۆمان ده‌رده‌که‌وێت که ئه‌و مکانیزمه زۆریش ئاسایی نیه و ئه‌گه‌ر مرۆڤه‌کان خاوه‌ن سیسته‌مێکی پێوه‌ندی ستانداردی ئینسانی بن له‌ نێوان خۆیاندا، پێویست ناکات که مرۆڤ هه‌تا ئه‌و ڕاده‌یه له‌گه‌ڵ ئاژه‌ڵ تێکه‌ڵ بێت و خۆشه‌ویستی به ئاژه‌ل جێ به خۆشه‌ویستیی مرۆڤ لێژبکات. ئه‌وه شتێکی ئاسایی نیه، ئه‌وه به‌ڵگه‌یه‌که له ته‌نیایی مرۆڤی ڕۆژئاوایی و ئه‌و قسه‌یه‌‌یش به واتای ته‌ئییدکردنی من له بیسمیلی ئیسلام له سه‌گ نیه.

په‌ڕی پێشتر «|» په‌ڕی دواتر